كيف تحب القراءة
انت من النوع اللى نفسك تبقى متعلم .. مثقف ..
عندك معرفه .وو بس مش متعود على القراءة
وفى نفسك الوقت نفسك تحب القراءة وعايز تتعود عليها بس مش عارف أزاى صح ؟! هقولك أنا الطريقة السحرية ياسيدى !
1): أنسى خالص انك مش بتحب القراءة أنسى
الكلمة دى أصلاً اشطبها من قاموس حياتك وبلاش ترددها نهائى بالعكس ! ردد غيرها ...
ردد معى أنا بحب القراءة ....
أنا هقرأ إن شاء الله ....
(طبعاً مش لازم بصوت عالى يعنى )
خليها فى سرك بس اهم شئ رددها كتير بجد مش
مرة واحدة
2): ادخل ع النت وأكتب على العم جوجل ...(
فضل القراءة – فؤائد القراءة _ كيف أحب القراءة ) هيظهرلك مقالات كتير = لو أنت بجد صادق وواخد
المواضع جد مش هزار مش هتكسل وأكيد هتقرأ مقالتين ثلاثة
3): أنوى النية الطيبه لله انك بترفع
الجهل عن نفسك وبترضى ربك انك هتقرأ وتتعلم شئ يفيدك ويفيد غيرك دنيا ودين
4): شوف انت بتحب مجال ايه (دين – سياسة –
علم نفس – طبيخ – رويات ....)
فمثلاً بتحب الرويات وتحب تسمع قصص كتير ونفسك
تقرأ رويات قصيرة ومطولة وكدهون هتعمل ايه بقا ؟
هتروح لصديق واثنين سبقوك فى المجال ده وتسألهم عن
روايه لغتها سهلة وتفتح النفس للقراءة وتكون مش طويله وتناسب مودك يعنى إجتماعية
ولا رومانسيه ولا رعب !
5): شوف انسب وقت يكون مودك تمام فيه
والجو هادى وتاخد الرواية وتروح مكان هادى لوحدك وليكن حجرة مغلقة
6): ها دخلت الحجرة ... وقفلت الباب ؟ بص
بقا ياسيدى سيبك من جو الإحباط واليأس
وأخواتها دول وركز فى شئ آخر الإرادة والعزيمة خليك شجاع يعنى وعندك شخصية واستعين
بالله وأبدأ قراءة ياكبير
7): طبيعى طبعاً هيقبلك عقبات فى أول
الطريق هتقرأ صفحتين ثلاثة وهتحس بملل ! = لازم تصبر خليك كول ياغالى
تقرأ تانى صفحتين ثلاثة وتقول لأ..لأ..لأ أنا
مش هكملها أنا عارف نفسى ! ياااراجل خليك راجل ... سيبك من الضعف ده مينفعش أنت
أقوى من كدة وهتقدر تتحكم فى شخصيتك صدقنى جرب بس المرة دى للأخر وهتعرف إنى بتكلم
بجد وهتعرف أنك قوى بجد
تقرأ صفحتين ثلاثة بعد كدة وتقول يااااه
بقالى ربع ساعة بحالها بقرأ مش فاهم إيتوها حاجة ! رغم إنى ذكى والله شكلها كدة
رواية غبية وانا هوجع دماغى ليه أنا خلاص هسيبها ولما أفضى اشوف غيرها وأدينى جربت
وحولت وعملت اللى عليا ! ( انت هتقولى )!
ياعمونا مش كدة !
هفكرك بالحاج محمود عباس العقاد قال ايه
ياعم بقا ( ليس هناك كتابا أقرأه و لا أستفيد منه شيئا جديدا ، فحتى الكتاب التافه
أستفيد من قراءته ، أني تعلمت شيئا جديدا هو ما هي التفاهة ؟)
وحتى أنا مرة كنت عند شيخى ورأيت عندة
مجلة قلبت فى صفحاتها لقتها من وجهة نظرى مجلة تافهة وهايفة !
قلت : له شيح وانت هتقرأ دى ؟!
قال : أه !
قلت : طيب ليه وهتستفاد منها ايه دى ؟!
قال: بص ياكريم مفيش شئ مش هتقرأه مش
هتستفاد منه وأنا هقرأ المجلة علشان استفاد من أسلوبهم فى كتابة المقالات !
حقاً كلام مقنع
وأتذكر أيضاً كلام صديق لى قالى (الكتاب لو
طلعت منه بمعلومة واحدة والمحاضرة لو طلعت منها بمعلومة واحدة يبقى أنا استفدت ومش
خسرت شئ ! )
ها يابطل أقتنعت ؟!
طيب الحمد لله كمل بقا قراءة وادعيلى
